2019 වසරේ පාස්කු ඉරුදින කොළඹ, මීගමුව, මඩකලපුව සහ තදාසන්න ප්රදේශවල සංචාරක හෝටල් හා කිතුණු දේවස්ථාන ඉලක්ක කර ගනිමින් මරාගෙන මැරෙන බෝම්බ ප්රහාර මාලාවක් එල්ල කිරීම, කුමන්ත්රණය කිරීම සහ ආධාර අනුබල දීම ඇතුළු චෝදනා 23,270ක් යටතේ නවුෆර් මවුලවී ඇතුළු විත්තිකරුවන් 24 දෙනෙකුට එරෙහිව පැවති නඩු විභාගය අවසන් කරමින්, එහි තීන්දුව සප්තැම්බර් මස 22 වන දින ප්රකාශයට පත් කරන බව කොළඹ ත්රිපුද්ගල මහාධිකරණ විනිසුරු මඩුල්ල නිවේදනය කළේය.
නවරත්න මාරසිංහ, රාමනාදන් කන්නන් සහ සුජීව නිශ්ශංක යන ත්රිපුද්ගල මහාධිකරණ විනිසුරු මඩුල්ල ඉදිරියේ වසර පහකට ආසන්න කාලයක් මෙම දීර්ඝ නඩු විභාගය පැවැත්විණි. එහිදී දෙපාර්ශ්වයේ ලිඛිත දේශන හෝ සටහන් වේ නම් ඒවා සැප්තැම්බර් මස 8 වන දිනට පෙර ලබා දෙන ලෙස විනිසුරු මඩුල්ල නියෝග කර ඇත.
නඩු විභාගයේ විශේෂතා සහ සාක්ෂි පරිමාව
ශ්රී ලංකා නීති ඉතිහාසයේ දැවැන්තම නඩුවක් වන මෙහි විශේෂිත කරුණු කිහිපයක්ම වේ:
සාක්ෂිකරුවන් සහ නඩු භාණ්ඩ: පැමිණිල්ල වෙනුවෙන් පුද්ගලයින් 2,309 දෙනෙකු සාක්ෂි ලබා දී ඇති අතර, පුපුරණ ද්රව්ය, රසායනික ද්රව්ය, කඩු සහ ගිනි අවි ඇතුළු නඩු භාණ්ඩ 2,076ක් ඉදිරිපත් කර ඇත.
පාපොච්චාරණ සහ වාර්තා: ත්රස්තවාදය වැළැක්වීමේ පනත යටතේ විත්තිකරුවන් ස්වේච්ඡාවෙන් ලබා දුන් බවට තීරණය වූ පාපොච්චාරණ 10ක් සාක්ෂි ලෙස පිළිගෙන තිබේ. මීට අමතරව රජයේ රස පරීක්ෂක වාර්තා, DNA වාර්තා සහ අධිකරණ වෛද්ය වාර්තා ද ඉදිරිපත් කෙරිණි.
මහජන විනාශය: මෙම මරාගෙන මැරෙන ප්රහාරවලින් අහිංසක පුද්ගලයින් 493 දෙනෙකු ජීවිතක්ෂයට පත්ව තවත් 568 දෙනෙකු තුවාල ලැබූහ.
“මහමොළකරු” යැයි කියූ නවුෆර් මවුලවී අධිකරණයේදී දැවූ ප්රතිචාරය
මෙම නඩුවේ ප්රධාන විත්තිකරු මෙන්ම ප්රහාරයේ ‘මහමොළකරු’ ලෙස හැඳින්වුණු නවුෆර් මවුලවී (මොහොම්මදු ඊබ්රහිම් මොහොම්මදු නවුෆර්) විත්ති කූඩුවේ සිට පැය දෙකට ආසන්න කාලයක් අදහස් දක්වමින්, තමාට එල්ල වී ඇති සියලු චෝදනා දැඩි ලෙස ප්රතික්ෂේප කළේය.
ඔහු අධිකරණය හමුවේ වැඩිදුරටත් කියා සිටියේ:
පාපොච්චාරණය සම්බන්ධයෙන්: අපරාධ පරීක්ෂණ දෙපාර්තමේන්තුව (CID) විසින් තමන්ගෙන් ලබාගත් බව කියන පාපොච්චාරණය සම්පූර්ණයෙන්ම නීති විරෝධී බවත්, එහි ඇති තම නම හැර අනෙක් සියලු කරුණු අසත්ය බවත් ඔහු පැවසීය. තමන්ට රඳවා සිටින කාලය තුළ පහරදීම් සිදු වූ බවද ඔහු මීට පෙර අධිකරණ වෛද්යවරයා හමුවේ පවසා ඇත.
සහරාන් හෂීම් සමඟ සබඳතා: සහරාන් හෂීම් විවාහ වී සිටින්නේ තම ඥාති කාන්තාවක් නිසා ඔහුව දැන සිටියද, 2007 සිට 2017 දක්වා කාලය තුළ සහරාන් සමඟ කිසිදු සම්බන්ධයක් නොතිබූ බවත්, ඔහුගේ ජාතික තව්හීද් ජමාත් (NTJ) සංවිධානයට තමන් දැඩි ලෙස විරුද්ධ වූ බවත් ඔහු සඳහන් කළේය.
‘ජිහාද්’ අර්ථකථනය: තමන් කළ ආගමික දේශනවලදී ‘ජිහාද්’ යන්න වැරදි ලෙස අර්ථ දක්වා අන්තවාදය පැතිරවූ බවට ගෙන එන චෝදනා ප්රතික්ෂේප කළ ඔහු, ඉස්ලාමීය ඉගැන්වීම් අනුව ‘ජිහාද්’ යනු අසීරුවෙන් කරන ක්රියාවක් හෝ ආත්මාරක්ෂාව සඳහා ගන්නා තීරණයක් බවත්, සාක්ෂිකරුවන් තමන් කළ දේශනවලින් කොටසක් පමණක් උපුටා ගනිමින් ඒවා විකෘති කර ඉදිරිපත් කර ඇති බවත් කියා සිටියේය.
තමන් කිසිදු අන්තවාදී සංවිධානයකට හෝ ප්රහාරයකට සහය දී නොමැති බැවින් සියලු චෝදනාවලින් තමන් නිදොස් කොට නිදහස් කරන ලෙස ඔහු ඉල්ලා සිටියේය.
Be the first to comment