2019 වසරේ සිදුවූ පාස්කු ඉරිදා ත්රස්ත ප්රහාරය සම්බන්ධයෙන් දැනට ක්රියාත්මක වන විමර්ශන කටයුතු අඩාල කිරීමට ඇතැම් පිරිස් උත්සාහ කරන බව ශ්රී ලංකා මුස්ලිම් කොංග්රස් (SLMC) උප සභාපති සහ පාර්ලිමේන්තු මන්ත්රී ආචාර්ය එම්.එල්.ඒ.එම්. හිස්බුල්ලා මහතා පවසයි. පසුගිය බ්රහස්පතින්දා පැවැති ප්රසිද්ධ උත්සවයක් අමතමින් ඔහු අවධාරණය කළේ, තරාතිරම හෝ බලපුළුවන්කාරකම් නොබලා මෙම විනාශයට වගකිව යුතු සියලුම දෙනා නීතිය හමුවට පැමිණවිය යුතු බවයි.
වත්මන් ජනාධිපති අනුර කුමාර දිසානායක මහතාගේ රජය යටතේ මේ වන විට විමර්ශන සිදු කෙරෙමින් පවතින බවත්, නමුත් ඇතැම් පුද්ගලයන් ඊට බාධා කිරීමට ක්රියා කරන බවත් මන්ත්රීවරයා මෙහිදී පෙන්වා දුන්නේය.
ප්රහාරය හේතුවෙන් රටම දැඩි ලෙස පසුබෑමකට ලක්වූ අතර, ඉන් වැඩිම ජීවිත හා දේපළ හානියක් සිදුවූයේ කිතුනු ජනතාවට බව ඔහු සිහිපත් කළේය. එමෙන්ම, ප්රහාරයෙන් පසු විශේෂයෙන්ම කාත්තන්කුඩි ප්රදේශයේ මුස්ලිම් ජනතාවට ද විවිධ දුෂ්කරතාවලට, මූල්යමය පාඩුවලට මෙන්ම පදනම් විරහිත චෝදනාවලට මුහුණ දීමට සිදුවූ බව හිස්බුල්ලා මහතා ප්රකාශ කළේය.
මෙම ඛේදවාචකයට මුස්ලිම් ප්රජාවගේ කිසිදු සම්බන්ධයක් නොමැති බවට නිල වශයෙන් තහවුරු විය යුතු බව පැවසූ මන්ත්රීවරයා, සාධාරණය ඉටු කිරීම සඳහා දැනට ක්රියාත්මක විමර්ශනවලට පූර්ණ සහයෝගය ලබාදීමට තම ප්රජාව සූදානම් බවද සඳහන් කළේය. ප්රහාරයට සම්බන්ධ සියලුම වැරදිකරුවන් ඔවුන්ගේ තනතුරු, බලය හෝ ආර්ථික ශක්තිය නොතකා නීතිය හමුවට පමුණුවා වින්දිතයන්ට සාධාරණය ඉටු කරන ලෙස ඔහු රජයෙන් ඉල්ලා සිටියි.
Be the first to comment