විපක්ෂය පාර්ලිමේන්තුව තුළ කෙතරම් කලබල ඇති කළද, වර්තමාන අධිකරණ පද්ධතිය තුළ නඩු විභාග වන වේගය හෝ තීන්දු දෙන වේගය කිසිසේත් අඩු නොකරන බව අධිකරණ සහ ජාතික ඒකාබද්ධතා අමාත්ය හර්ෂණ නානායක්කාර මහතා අවධාරණය කරයි. විපක්ෂය මේ වන විට කෑගසමින් සිටින්නේ නීතියේ ආධිපත්යය රැකීමට නොව, තමන්ට එරෙහිව විභාග වන නඩුවලට ඇති බිය නිසා බවද අමාත්යවරයා පවසයි.
ඊයේ (23) පාර්ලිමේන්තු විවාදයට එක්වෙමින් අමාත්යවරයා මේ බව ප්රකාශ කළේය.
“දැන් විමර්ශනත් වේගවත් – නඩු තීන්දුත් වේගවත්”
අමාත්යවරයා පෙන්වා දෙන්නේ පසුගිය කාලයට වඩා වර්තමානයේදී නඩු විභාග කිරීමේ ක්රියාවලිය බෙහෙවින් කඩිනම් වී ඇති බවයි.
වේගවත් වූ ක්රියාවලිය: පෙර නොවූ විරූ ලෙස විමර්ශන කටයුතු වේගවත් වී ඇති අතර, පසුගිය වසරට සාපේක්ෂව නඩු ඇසීමද ඉහළ ගොස් ඇත.
විපක්ෂයේ බිය: ලැබෙන්නට නියමිත නඩු තීන්දු මොනවාදැයි ජනතාව මෙන්ම විපක්ෂයද හොඳින්ම දන්නා බවත්, මේ සියලු කලබල පවතින්නේ එම නඩු කටයුතු කෙසේ හෝ නතර කරගැනීමේ පටු අරමුණින් බවත් ඔහු සඳහන් කළේය.
“පාදඩ සංස්කෘතිය සහ සෙංකෝලය”
විපක්ෂයේ හැසිරීම දැඩි දෝෂදර්ශනයට ලක් කරමින් අමාත්යවරයා මෙසේද පැවසීය:
“වසර ගණනාවක සිට වෙනස් නොවන පාදඩ සංස්කෘතියක් තමයි මේ විපක්ෂය අදටත් නියෝජනය කරන්නේ. පාර්ලිමේන්තුව ඇතුළේ කරන්න පුළුවන් හැම මඩ අවලාදයක්ම කරලා, දැන් සෙංකෝලය උස්සගෙන දුවන්න හදනවා. මට කියන්න තියෙන්නේ මෙච්චරයි, සෙංකෝලය උස්සගෙන ගියා නෙවෙයි, ඔයගොල්ලෝ ඒක ගිල්ලත් නඩු අහන වේගයවත්, තීන්දු දෙන වේගයවත් අඩු වෙන්නේ නැහැ.”
විනිසුරුවරුන්ගේ විශ්රාම වයස දීර්ඝ කිරීමේ සාකච්ඡා
විනිසුරුවරුන්ගේ විශ්රාම වයස් සීමාව දීර්ඝ කිරීම සම්බන්ධයෙන් පවතින කතාබහ පිළිබඳවද අමාත්යවරයා මෙහිදී පැහැදිලි කිරීමක් කළේය.
එවැනි සාකච්ඡාවක් පවතින බව සැබෑවක් වන අතර, ඊට එරෙහිව ඉදිරිපත් වන කරුණුද පවතින බව ඔහු පිළිගත්තේය.
ප්රජාතන්ත්රවාදී රජයක් ලෙස සියලු පාර්ශවයන්ගේ අදහස්වලට සවන් දී වඩාත් සුදුසුම තීරණය ගැනීමට රජය කටයුතු කරන බව හෙතෙම කියා සිටියේය.
අවසාන වශයෙන් අමාත්යවරයා අවධාරණය කළේ, මහජනතාව රජයට ලබා දී ඇති බලසහිත වරමට සැමවිටම ගරු කරන බවයි. එබැවින් විපක්ෂය මනංකල්පිත ලෝකවල හිඳිමින්, නඩුවලට ඇති බිය නිසා සිදුකරන මෙවැනි “විකාර දෙඩවීම්වල” කිසිදු පදනමක් නොමැති බවද ඔහු වැඩිදුරටත් පැවසීය.
Be the first to comment