ලංකාවේ වෙනත් ප්රදේශවලට වඩා මොරටුව ප්රදේශයේ බඩු මිල අහස උසට නැඟ ඇති බව අද වන විට රහසක් නොවේ. “මොරටුවේ මිනිස්සු කීයට දුන්නත් ගන්නවා” යන අන්තනෝමතික මතයේ සිටිමින් මොරටුවේ සිල්ලර වෙළඳසැල් පමණක් නොව, ‘තොග වෙළඳසැල්’ කියා ලේබල් ගසාගත් ස්ථානවල පවා පාරිභෝගිකයන්ව දශක ගණනාවක සිට මහා සූරාකෑමකට ලක් කරමින් සිටියි. මේ සියල්ල දෙස බලා සිටිය යුතු, මොරටුව ප්රදේශය භාර පාරිභෝගික කටයුතු පිළිබඳ අධිකාරියේ කොළඹ දිස්ත්රික් කාර්යාලයේ නිලධාරීන් අද වන විට මියැදී හෝ නිද්රාශීලීව සිටින්නේද යන්න මොරටුව වැසියන් නඟන ප්රධානතම ප්රශ්නයයි.
බෝගස අසල දින පොළේ සිදුවන මංකොල්ලය
විශේෂයෙන්ම මොරටුව බෝගස අසල පිහිටි දින පොළ පිළිබඳව මොරටුවේ පීඩාවට පත් ජනතාවගෙන් එල්ල වන්නේ දැඩි දෝෂාරෝපණයකි. එළවළු, පලතුරු ඇතුළු අත්යවශ්ය ද්රව්ය සඳහා පාලන මිලක් හෝ සාධාරණ මිලක් එහි ක්රියාත්මක නොවේ. වෙනත් නගරවල ඉතා සහන මිලට ඇති ද්රව්ය, මොරටුව බෝගස අසල පොළට එන විට දෙගුණයකින්, තෙගුණයකින් ඉහළ යන්නේ කිනම් ආර්ථික න්යායකට අනුවද? තොග කඩවල් යැයි කියාගන්නා ස්ථානවල පවා සිදුවන්නේ සිල්ලර මිලටත් වඩා සූරාකෑමකි.
යූටියුබ් සංදර්ශන එපා, සැබෑ වැටලීම් කරන්න!
පාරිභෝගික අධිකාරියේ නිලධාරීන්ට මොරටුව මතක් වන්නේ කලාතුරකිනි. ඔවුන් කරන්නේ ඉඳහිට යූටියුබ් නාලිකාවක කැමරාවක් හෝ මාධ්යවේදියෙකු පිරිවරාගෙන පැමිණ, කුමන හෝ වෙළෙන්දෙකු අල්ලා නීතිය ක්රියාත්මක කරනවා සේ පෙන්වා ‘සංදර්ශනයක්’ දමා මාරු වී යාම පමණි. මේ කැමරා සංදර්ශනවලින් මොරටුවේ අහිංසක ජනතාවගේ මුදල් පසුම්බියට සිදුවන සහනයක් නැත. නිලධාරීන් හැරී යනවාත් සමඟම වෙළෙන්දන් නැවතත් සුපුරුදු පරිදි ජනතාව හූරා කෑම අරඹයි.
පීඩාවට පත් මොරටු වැසියන්ගේ අවසන් පණිවිඩය
මොරටුවේ ජනතාව හැමදාම නිහඬව සූරාකෑමට ලක්වනු ඇතැයි වෙළඳ මාෆියාව සහ පාරිභෝගික අධිකාරිය සිතන්නේ නම් එය මුලාවකි. පාරිභෝගික කටයුතු පිළිබඳ අධිකාරිය වහාම ක්රියාත්මක වී, මොරටුව බෝගස අසල දින පොළ සහ තොග වෙළඳසැල් වෙත ක්ෂේත්ර නිලධාරීන් යොදවා, දෛනිකව මිල ගණන් නියාමනය කළ යුතුය.
සංදර්ශන දේශපාලනය සහ මාධ්ය සංදර්ශන නවතා, ජනතාව වෙනුවෙන් සැබෑ ලෙසම පෙනී සිටින ලෙසත්, මොරටුව ගසාකන මිල මාෆියාව වහාම මර්දනය කරන ලෙසත් පීඩාවට පත් සමස්ත මොරටු වැසියෝ පාරිභෝගික අධිකාරියෙන් දැඩිව ඉල්ලා සිටිති!
පාරිභෝගිකයින්ගේ අවධානයට: මොරටුව ප්රදේශයේ සිදුවන මෙවැනි අසාධාරණ මිල ඉහළ දැමීම් සහ පාරිභෝගික අයිතීන් උල්ලංඝනය කිරීම් පිළිබඳව පාරිභෝගික කටයුතු පිළිබඳ අධිකාරියේ ක්ෂණික ඇමතුම් අංකය වන 1977 ඔස්සේ සෘජුවම පැමිණිලි කිරීමටද ඔබට හැකියාව පවතී.
Be the first to comment